بابر اعظم کو بطور کھلاڑی کچھ ثابت کرنے کی ضرورت نہیں : محمد عامر
بابر اعظم نے 15 نومبر کو چیئرمین پی سی بی ذکا اشرف سے ملاقات کے بعد تمام فارمیٹس کی کپتانی سے استعفیٰ دے دیا تھا
لاہور (اردو پوائنٹ تازہ ترین اخبار ۔ 17 نومبر 2023ء ) پاکستان کے سابق فاسٹ باؤلر محمد عامر نے کہا ہے کہ بابر اعظم جنہوں نے بدھ کو تمام فارمیٹ کی کپتانی سے استعفیٰ دے دیا ہے انہیں خود کو بطور کھلاڑی ثابت کرنے کی ضرورت نہیں ہے۔ ایک مقامی اسپورٹس شو میں گفتگو کے دوران محمد عامر نے زور دے کر کہا کہ بابر کو کپتان کے عہدے سے ہٹانے کو ایک چیلنج کے طور پر دیکھنا چاہیے۔
عامر کے مطابق بابر اعظم پہلے ہی خود کو ایک ہنر مند کھلاڑی کے طور پر منوا چکے ہیں اور اس حوالے سے ثابت کرنے کے لیے کچھ نہیں بچا۔ محمد عامر نے کہا کہ "میرا بابر اعظم کو مشورہ ہے کہ وہ کپتانی اسے ایک چیلنج کے طور پر لیں۔ انہیں بطور کھلاڑی ثابت کرنے کے لیے کچھ نہیں ہے۔ ویرات کوہلی کو سوشل میڈیا کے ذریعے معلوم ہوا کہ انہیں کپتانی سے ہٹا دیا گیا ہے۔
انہوں نے مزید کہا کہ شان مسعود کا ڈومیسٹک سیزن شاندار رہا ہے۔ وہ ریڈ بال فارمیٹ میں ایک بہترین کپتان ثابت ہو سکتا ہے۔ مقامی اسپورٹس شو میں آل راؤنڈر عماد وسیم بھی موجود تھے جہاں انہوں نے اپنی رائے کا اظہار کرتے ہوئے کہا کہ بابر کا فیصلہ قابل ستائش ہے کیونکہ اس سے انہیں کپتانی کا دباؤ کم کرنے میں مدد ملے گی۔ عماد وسیم نے کہا کہ میرے خیال میں بابر اعظم کا فیصلہ بہت اچھا ہے۔
اب وہ کپتانی کے اضافی دباؤ کے بغیر اپنی بیٹنگ پر پوری توجہ مرکوز کر سکتے ہیں اور میں شاہین آفریدی کو بطور ٹی ٹونٹی کپتان خوش آمدید کہنا چاہتا ہوں۔ واضح رہے کہ شان مسعود کو ریڈ بال کرکٹ کا کپتان مقرر کیا گیا ہے جب کہ شاہین آفریدی 2024ء میں ہونے والے ٹی ٹونٹی ورلڈ کپ تک ٹی ٹوئنٹی ٹیم کی قیادت کریں گے۔ اس کے علاوہ پاکستان کرکٹ بورڈ (پی سی بی) نے ڈائریکٹر کرکٹ مکی آرتھر سمیت پاکستان مینز ٹیم کے مکمل کوچنگ اسٹاف کو فارغ کرنے کا فیصلہ کیا ہے۔
سرکاری بیان کے مطابق پی سی بی نے ہیڈ کوچ گرانٹ بریڈ برن اور بیٹنگ کوچ اینڈریو پوٹک سمیت پورے کوچنگ اسٹاف کے کردار کو تبدیل کردیا ہے۔ ہفتے کے شروع میں مورنے مورکل نے باؤلنگ کوچ کی حیثیت سے اپنے عہدے سے استعفیٰ دے دیا تھا، اور یہ توقع کی جا رہی ہے کہ عمر گل کو ان کا جانشین مقرر کیا جائے گا۔
